دولار الختيار
الكاتب عماد النجار
صبية عمرها عشرين ربيعاً، العريس ختيار عمرو دولار ينطح دولار .. لا حكي لا عشرة لا خطبة، عملوا حفلة العرس شي مية طبال و زمار .. العشا كان من قريبو مقدمو للعريس واحد قريبو، خروف محشي قريدس و كفيار.. أم العروس مين قدا ما عادت تتهدا، تنغل نغل و تنخل بالناس نخل، شفتو عريس بنتي كريم منلّلو البخل.
شوفو الغنى و عيشة الهنى، حظ بنتي مش متل حظي أنا .. طلعلها احلى عريس شب .. شب عالبنت و علينا شب، ضعيف نحيف منو دب، هيك بيكون الحب، والقلب نار مين عن عريس بنتي ختيار.
تحكي لحالها مش شايفي حدا قبالها تمشي متل الديك كعب عالي فستان بلالي، وتحتو في شي سميك.. ما بعرف هيك شفتا. و على شفتها 2 سنتي سماكة الحمرة و السكربيني حمرا، وينك يا محلل الخمرة، بالإبتسامة تتمهل تعرم تبرز صدرها و تتأهل.
حضرتنا قاعدين ساكتين و الإيدين بالأكل نازلين طالعين، شو الناس شغلتها الحكي، وعالأكل العريس من كتر كرمو كل ما أكلنا بلكوم نسمع طقطقت الزلعوم، إم العروس تغط تقول شفتوا شو مهضوم نحن نقلها شفنا معلوم، طيب الأكل شي بزوم شي بلا زوم، وهجم المعزوم و المش معزوم بحجة الفرحة تدوم.
وصلت الزفة قويت الزقفي العريس مسموم، بدو يبوس و العروس تحوص كأنو تحتها ألف دبوس، المهم باسها بالأول على راسها ونزلت البوسة، الكل شافها كيف باسها وطاروا نص شفافها، قد ما هو محروم يا مظلوم، حكمتو الرجفة شو ما العمر عالحفة، العروس راسها بالمال مهووس. خلصت الحفلة فلت الزفة صار وقت العريس يفك هالبكلة، ونحنا كل مين على بيتو فل ما حدا ضل، عرفنا تاني نهار، انو العريس حكمو زنار نار ونهار .. وطلعت الصرخة مات العريس فياكرا وكفيار و القلب نار مخاطر يا دار، وأم العروس راسها مكسور، العروس انكسر خاطرها، ترملت عبكير كتير.
“يا أخد القرد ع مالو”، هيك الناس شغلتها الحكي، ودار الحكي حيالله حكي في ناس قالوا قتلو لتورثو، وفي ناس قالو من أولها باين أخرها، و في ناس شمتت و الله لا يشمت حدا بحدا، لكانوا صحاب وقت الأكل صاروا عدا، أم العروس جنت على بنتها بشوية فلوس، أتاري صاحبنا الختيار كان عمرو كم دولار مش أكتر، الأعمار بأيد الله، و زلاعيم الأم بأيد بنتها العروس، هيك صار.
