إعــــــلان 
رسالة مؤثرة من غزاوية : “آه في ناس بتموت وماتت من الجوع.. احنا مش صامدين احنا منكوببن”.. !
خاص مناشير
وصلنا الى بريد “مناشير” الالكتروني رسالة مؤثرة من مواطنة غزاوية كتبت فيها حال المواطن في غزة وهو يواجه حرب ابادة.. وتمنت ان لا يذكر اسمها خوفاً من أن يعتبرها البعض “شحادة” حسب تعبيرها، الا انني سأذكر الحرف الأول من اسمها والاول من اسم عائلتها (ن. ن)، وهي شقيقة شهيد خلال المواجهات مع العدو ومعظم عائلتها استشهد جراء القصف وتدمير منازلهم.
قالت:
حبيت أفضفض معكم و نحكي شوي … سواء بالتعليقات او على الخاص….
أنا كتير بفكر إني أطلب المساعده متل غيري كتار عملوا روابط او احط رقم حسابي لحتى يقدروا يطلعوا من غزة
أنا كتير بيجي عبالي ليش ما أعمل متلهم خاصه اني خسرت كلشي بمعنى الكلمه حتى عيشة متل الخلق بطلنا قادرين..
انا ما بدي حد يتبرعلي عشان أسافر واهرب من الموت لأنه قناعتي انه ما حد بيهرب من الموت بس يلي بتصحله يطلع ما يقصر ويطلع هوا وعيلته ..هاد الصح.. اه صح هيا الفلوس يلي مش مخلياني اطلع انا وعيلتي ما راح اكون مثاليه وأقلكم ما بترك الوطن لا لا بطلع وما برجع كمان لانه ما ضل الي شي هون.
بس إحنا بحاجه اكل وشرب ولبس خاصه انه طلعنا من بيوتنا بأواعينا وأكيد أغلبكم متلي…. يعني لو هافكر قبل السفر هافكر بأولويات الحياه حتى نقدر نكمل ونعيش عالاقل من اكل وشرب ولبس …
انتو احكولي كيف بدنا نصمد زي ما بوصفوا صمودنا بالاسطوري والي هوا فش منه أصلا لانه احنا مش صامدين..
إحنا منكوبين وموجوعين ومقهورين عشان مين وليش ولمتى صدقوني مش عارفه..
فش حد بموت من الجوع كتير بنحكيها بس صدقوني مش صحيحه ابدا لانه اه في ناس بتمووت وماتت من الجوع
خطر عبالي فكره في ظل هالاوضاع انه ليه ما نعطي زكاة رمضان لبعض من خلال الجروب يعني الي حابه تطلع زكاة مالها تتواصل معي والي محتاج برضه يتواصل وانا بوصلهم لبعض من باب التخفيف عن بعض لا أكثر ولا أقل مع انه فعليا كلنا بحاجه للدعم وكلنا أصبحنا محتاجين وأنا أولكم للاسف بقولها وانا خجلانة من نفسي …
شوفوا احنا اهل عز وكرامه بكل تأكيد وما حدا بيقدر يزاود علينا وانه نطلب الدعم من الناس المقتدره أبدا مش غلط في ظل هالظروف السيئة عالجميع.
