ريسيتال مميز “ثابتون في ارضنا” في منزل ابراهيم الصقر
مناشير
أقام رجل الأعمال ابراهيم الصقر وعائلته ريسيتالاً ميلادياً مميزاً تألق فيه المرنم المبدع ايان اريدو تحت عنوان “ثابتون في ارضنا” في ديوان منزله في حوش الامراء – البساتين حضره عدد من المطارنة والارشمندريت عبدالله عاصي، مدير عام وزارة الزراعة لويس لحود، ورئيس بلدية شتورا نقولا عاصي، ورئيس بلدية المريجات السابق فيليب مشعلاني، ورئيس غرفة الصناعة نقولا ابو فيصل، وحشد من الفعاليات الاجتماعية والاقتصادية.
كما قدم الارشمندريت عاصي وقفة وتأمل روحي.
بداية رحبت الدكتورة ماغي ابراهيم الصقر بالحضور وقالت :
مسا الفرح والرجا باحلى زمن.. زمن الميلاد.
ميلاد يسوع يللي جايي على رغم كل الوجع, كل دموع القهر وكل الفقر اللي عم بعيشو الانسان بهالبلد.
الليلة راح نجدد الفرح بولادتك يا يسوع. راح نقول لأ لكل ارادة بتكسر الامل بالحياة وبتجردنا من انسانيتنا.
راح نقول لأ لكل السواد اللي عم بيكحل قلوب وعيون مسؤولين واصحاب قرار همن وكل همن يحطموا ارادتنا وعزيمتنا بالبقاء بوطن القداسة والقديسين. وطن مشي على أرض يسوع وانذكر 72 مرة بالكتاب المقدس. وطن قد ما حاولوا يدمروا حجارو ويقتلوا فيه الجسد ويشلحونا الارض بقوة الشر والسلاح ويحولوا لجزيرة نائية معزولة عن محيطو…
لأ. لأ ماراح نترك ونفل لانك يا يسوع علمتنا انو بالايمان والرجا منولد من جديد. وهيك راح يرجع يخلق هالوطن اللي ولا مرة تخليت عنو وحولتو لبلد القديسين، شربل ورفقا والحرديني واسطفان ويعقوب …
وتابعت الليلة يا يسوع عم نحتفل بميلادك
ع ترانيم صوت بيمجد الخالق واصوات كورال شباب وصبايا بتزرع الفرح والايمان وجايين متل المجوس يقدمولنا اصواتن بباقة ترانيم والحان تحت عنوان قابتون في ارضنا.
وقبل ما اترككن لنعيش سوا اجواء سحر ميلاد المخلص يسوع اسمحولي وقدام مغارة الطفل يسوع اشكرو لانو عطاني الروح تا اخلق ضمن عيلة ربتني انا واخواتي وخيي على الصلا والايمان بانو مع يسوع لا اخاف شيئا، وزرعني ببيت ما بيقبل الا ما يكون السند لكل محتاج والخادم المطيع لوصايا الله.
ولد المسيح هللويا. واهلا وسهلا بكل الحضور.
